A Xunta de Galicia, a través da Dirección Xeral de Mobilidade da Consellería de Infraestruturas e Mobilidade, participa en calidade de socia no Proxecto europeo CFAEFFIPLAT para a promoción do Corredor Atlántico Ferroviario de Mercadorías, dentro do programa Interreg IV-B Espazo Atlántico liderado polo departamento de Transportes do Goberno vasco.

O Corredor Atlántico conecta as rexións bañadas polo Atlántico, que son as que forman parte da Comisión do Arco Atlántico (Portugal, España, Francia, Reino Unido e Irlanda), Bélxica, Holanda, Alemaña, Dinamarca, Suecia e Noruega, prolongándose cara ao sur (porto de Alxeciras e Marrocos) e cara ao norte (portos de Amberes e Rótterdam, norte e leste de Europa). Cara ao leste conéctase co eixe Lyon-Ljubljana-Budapest ata a fronteira ucraína (Kiev) e co eixe Berlín-Varsovia ata a fronteira bielorrusa (Minsk).